广州打工仔总结出老板十大恶顶语录,每日上演办公室生存赛!
我地呢班打工仔,一生一世为钱币做奴隶
个种辛苦折堕讲出吓鬼
(死比你睇)
许冠杰嘅一首《半斤八两》
道出千千万万个打工仔嘅心声
喺广州,一个打工仔嘅一日
究竟会俾老板插几多次呢?
可能由你返工嗰一瞬间开始
你就要展开一场:办公室生存赛
忍忍忍忍忍忍忍忍忍忍忍忍*N次
最弊波士郁啲发威
(癫过鸡)
一咪喺处係唔係就乱嚟吠
当然呢句歌词
已经基本唔适用于广州打工仔界
因为呢家啲老世已经唔兴爆粗闹人
其实粗口都唔可怕
更可怕嘅係以下呢啲恶顶语录
1
今日好准时喔
08:59分踏正打卡
都未透顺条气,抬头一望
你老世已经企喺到望住你
然后望咗望只表,笑茄茄咁讲出呢句话
2
以前个小陈,一个当三个用
当你同老世反映唔够人手嘅时候
佢首先会话喺请人之前
係咪应该检讨下自己嘅工作方式同工作效率?
然后开始重提当年啱开公司
嗰班老员工一个抽十个嘅「盛况」
将成件事用无限夸张手法描述
再附送一句:「我当年都係咁捱过嚟」
係呀,你当年都未係老世
你当年啲楼都无咁贵
3
好羡慕你啊,又有得去旅游
当你提前两个月请好假
同老世汇报晒成个旅游行程
终于你顺利完成手头上所有项目嘅时候
喺你出发前一日,老世行埋嚟你个位度
好似啱啱先听同事讲你要去旅游咁
嘘寒问暖一翻
再赞扬一下其他同事嘅艰苦工作
成个过程都令你觉得
自己嘅离开好似令到公司损失过千万咁
4
做我地呢行日日加班好正常
个人认为老世根本无买手表嘅必要
因为佢地根本唔洗睇钟
成日6点突然同你讲「帮我改少少嘢」
可能再加多句「得唔得闲?」
其实六点收工呢件事你知我知嘎
唔通我答你赶住落班唔得闲咩?
然后喺每次开会,再强调一个:
加班先係符合地球规律,维护世界和平嘅Y理
赢晒!
5
有时真係唔明啲90后谂乜
唔捱得、无恒心、中意换工
情绪化、怕丑、抗压能力差.....
每次开会
你老世可以将90后所有缺点顺数再倒数一次
然而你放眼一望
公司基本都係90后
当然,90%嘅90后打工仔都唔知老细谂乜
6
今日咁得闲嘅?
十个老世有九个中意突击检查
剩低嗰个中意全天候持续性检查
无啦啦就会行埋嚟问你:「咁得闲嘅?」
当你谂住讲啱啱完成某项工作嘅时候
你老世早就估到啦
即刻截你胡:
「咁你搵唔搵到其他嘢做啊?」
7
你又请假?
係啊,係你啊,又係你请假啊!
如果大家周围嘅同事无病无痛
从来唔会有特殊情况需要请假
那么,你半年内请第二次假
你老世就用一句说话直插你心口:
「点解又係你!」
可能佢潜意识认为你请假唔洗扣钱~
8
我希望你將多d時間放喺工作度
你一个星期返六日班
每日八点出门,八点返到屋企
再喺屋企用两个钟时间处理
老世落班前一分钟交畀你嘅任务
每日你至少投身于工作十四个钟
剩低十个钟
你要解决温饱、睡眠、冲凉、喂狗
凼女朋友、了解时事热点、整屋企灯胆
喺朋友圈点赞维系友情等等等
你谂嚟谂去都唔明点解
点解硬係觉得你无用「多啲」时间工作
9
你就好啦又准时落班
自古以来
打工仔一直有个不成文嘅原则
如果你准时落班就等于无做好啲嘢
特别係当你身边嘅同事
喺六点零五分,仲啪啪啪敲键盘嘅时候
你以为轻手轻脚离开就无人发现
点知“已签到”嘅打卡声仲係出卖咗你
呢个时候,请接受同事炽热目光嘅洗礼
再附赠老世一句亲切嘅问候
10
任何员工都有被替代嘅可能
呢句应该係打工仔嘅职业生涯
最恶顶嘅一句说话吧
所以,就不断有员工
实现自己成为老世嘅可能
然后再同翻自己嘅员工,讲同一翻话
不断循环不断死循环....
“每个员工都觉得老细都天真
每个老世都觉得员工系万能”
唔知大家经历过
自己老板最恶顶嘅一句话係咩呢?
不妨留言同我地讲下,放心,佢睇唔到嘅~